Nýjasta kvikmynd Hlyns Pálmasonar, Ástin sem eftir er, verður heimsfrumsýnd í aðaldagskrá kvikmyndahátíðarinnar í Cannes 2025. Myndin verður sýnd í Cannes Premiere-flokki hátíðarinnar og er það í fyrsta sinn sem íslensk kvikmynd er valin í þennan virta flokk. Hátíðin fer fram í 78. sinn dagana 13.–24. maí.
Önnur mynd Hlyns í aðaldagskrá Cannes
Þetta er í annað sinn sem verk eftir Hlyn er valið í aðaldagskrá Cannes. Árið 2022 keppti Volaða land í Un Certain Regard-flokki og vann síðar til fjölda verðlauna. Sú mynd var einnig framlag Íslands til Óskarsverðlauna 2024 og komst á stuttlista akademíunnar í flokki erlendra kvikmynda. Einnig heimsfrumsýndi Hlynur Hvítan, hvítan dag í Semaine de la Critique í Cannes árið 2019.
Fjölskyldusaga í fjórum árstíðum
Ástin sem eftir er segir frá einu ári í lífi fjölskyldu þar sem foreldrarnir stíga fyrstu skrefin í átt að skilnaði. Í gegnum fjórar árstíðir fáum við að fylgjast með hversdagslegum, óvæntum, fyndnum og hjartnæmum augnablikum sem endurspegla breytingar í sambandi fjölskyldunnar.
Metfjöldi umsókna í ár
Alls sóttu 2.909 kvikmyndir um heimsfrumsýningu í Cannes í ár. Með því að vera valinn til sýningar í Cannes Premiere slæst Hlynur í hóp virtustu leikstjóra heims, þar á meðal Fatih Akin, Sebastián Lelio, Takeshi Kitano og Leos Carax.
Framleiðsla og leikarahópur
Myndin er framleidd af Antoni Mána Svanssyni hjá STILL VIVID og Katrínu Pors hjá danska framleiðslufyrirtækinu Snowglobe. Meðal leikara eru Saga Garðarsdóttir, Sverrir Guðnason, Ída Mekkín Hlynsdóttir, Þorgils Hlynsson, Grímur Hlynsson, Ingvar Sigurðsson og Anders Mossling.
Sterkur bakhjarlahópur
Meðframleiðendur myndarinnar eru Mikkel Jersin og Eva Jakobsen (Snowglobe, Danmörk), Nima Yousefi (HOBAB, Svíþjóð), Didar Domehri (Maneki Films, Frakkland), Anthony Muir og Kristina Börjeson (Film i Väst, Svíþjóð), auk Olivier Pere og Remi Burah (Arte France Cinema, Frakkland).
Verkefnið naut stuðnings frá Kvikmyndamiðstöð Íslands, Menningar- og viðskiptaráðuneyti Íslands, dönsku og sænsku kvikmyndasjóðunum, Nordisk Film & TV Fond, Creative Europe MEDIA, Sveitarfélagi Hornafjarðar, RÚV, Jour2Fête, ARTE, Max Dreifingu SVT og DR.
Alþjóðleg dreifing
New Europe Film Sales annast alþjóðlega söludreifingu myndarinnar. Fyrirtækið hefur áður sinnt dreifingu á verkum Hlyns, þar á meðal Volaða landi (Un Certain Regard, Cannes), Hvítum, hvítum, degi (Critics’ Week, Cannes) og Vetrarbræðrum (aðalkeppni Locarno), auk stuttmyndarinnar Hreiðri (Berlinale Special).
