Myndir mánaðarins- Janúar 2018 - Bíó

10 Myndir mánaðarins Nú árið er liðið ... Stórstjarna ársins Stórstjarna ársins 2017 er án nokkurs vafa ísraelska leikkonan Gal Gadot sem kom, var séð og sigraði kvikmyndahúsagesti um allan heim sem Diana Prince, öðru nafni Wonder Woman, fyrst í myndinni Batman v Superman: Dawn of Justice í vor, svo sem aðalpersónan í samnefndum sumarsmelli ársins, Wonder Woman , sem margir telja eina skemmtilegustu og best heppnuðu ofurhetjumynd sem gerð hefur verið, og að lokum í Justice League í haust. Gal á síðan eftir að verða áberandi á næstu árum, ekki bara sem Diana Prince í fleiri myndum þar sem Wonder Woman kemur við sögu heldur í öðrum myndum líka enda er hún nú orðin eftirsóttasta leikkona heims. Nýstirni ársins Valið á nýstirni ársins er heldur ekki erfitt en sá heiður fellur í skaut bandaríska leikaranum Timothée Chalamet sem heillað hefur alla gagnrýnendur og leiklistarunnendur með frammistöðu sinni í mynd- inni Call Me by Your Name eftir Luca Guadagnino, er skyndilega orðinn einn eftirsóttasti leikari í heimi fyrir vikið og nánast öruggur um að hljóta tilnefningu til Óskarsverðlauna. Vonandi nær hann að höndla frægðina sem fylgir og sýna enn betur hvað í honum býr. Barnastjarna ársins Þeir voru fáir sem höfðu heyrt minnst á hina sjö ára gömlu leikkonu Brooklynn Prince í upphafi ársins 2017 en nafn hennar er nú á allra vörum í Hollywood sem séð hafa myndina The Florida Project eftir Sean Baker þar sem hún leikur aðalhlutverkið á móti Willem Dafoe og þykir hreint út sagt stórkostleg í hlutverkinu. Brooklynn þykir líka mikill karakter og lætur ekki slá sig út af laginu, hvorki í viðtölum sem hún hefur farið í að undanförnu né í kastljósi fjölmiðla og þeir eru margir sem vona að hún fái tilnefningu til Óskarsverðlauna í janúar. Óvæntasti smellur ársins Bíómyndin Get Out fær útnefningu í þessum flokki, ekki bara fyrir að vera góð og hafa notið óvæntra vinsælda heldur einnig fyrir hversu hissa allir voru á því að fyrsta mynd grínistans Jordan Peele, sem fram að frumsýningu hennar var þekktastur fyrir samstarf sitt við Keegan- Michael Key, skyldi vera af þeim toga sem Get Out er. Myndin fær einnig prik fyrir óvænta sögu og handritið sem Jordan samdi sjálfur. Klúður ársins Mistökin sem gerð voru á Óskarsverðlaunahátíðinni 2017, þegar þau Warren Beatty og Fay Dunaway tilkynntu að Óskarinn fyrir bestu mynd ársins félli í skaut La La Land þegar það var í raun myndin Moonlight sem hlaut verðlaunin, eru klúður ársins að þessu sinni. Ekki er hægt að sakast við þau Warren og Fay enda fengu þau afhent umslag með þessum röngu upplýsingum. Reyndar sáu flestir sem horfðu á þetta í beinni útsendingu að eitthvað var að þegar Warren tók upp umslagið og leit á spjaldið því fát kom á hann þegar hann sá að þetta var í raun sama spjald og notað var til að tilkynna hvaða leikkona hafði hlotið Óskarinn fyrir besta leik ársins, en ekki það spjald sem hann átti von á. Warren hikaði því við að lesa upp nafn mynd- arinnar en því miður áttaði Fay sig ekki á þessu og las upp nafnið. Að vonum braust út mikill fögnuður í salnum og aðstandendur La La Land hópuðust upp á svið til að veita Óskarnum viðtöku og halda þakkarræðurnar. Á sama tíma sáu allir áhorfendur að eitthvað mikið var að því á bak við og í kringum hópinn upphófst mikið óðagot. Skömmu síðar komhið sanna í ljós, að rangt nafn hafði verið lesið upp og að það væri í raun Moonlight sem hlyti Óskarinn sem besta mynd ársins en ekki La La Land . Allt fór því vel að lokum, en þetta mikla og ótrúlega klúður verður alveg örugglega notað í nokkra brandara á Óskarsverðlaunahátíðinni 4. febrúar næstkomandi.