Look Who’s Back, bíómynd í Borat stíl, um nasistaleiðtogann Adolf Hitler í nútímanum í Berlín, fór beint á topp þýska aðsóknarlistans um helgina, sína þriðju viku á lista.
Myndin er kvikmyndagerð á samnefndri metsölubók Timur Vermes, sem kom út á Íslandi undir heitinu Aftur á kreik.
Myndin hefur nú þénað jafnvirði 13 milljóna Bandaríkjadala í bíó og er önnur metsölumynd framleiðandans Constantin á þessu ári, en hann gerði einnig stórmyndina Suck Me Shakespeer 2, sem hefur þénað meira en 65 milljónir Bandaríkjadala.
Um Aftur á kreik segir eftirfarandi á vef Forlagsins:
„Adolf Hitler vaknar einn góðan veðurdag árið 2011 í almenningsgarði í Berlín eftir að hafa sofið frá árinu 1945. Hann veit ekkert hvað hefur gerst í millitíðinni en hyggst halda sínu striki hvað sem á dynur. Allir sem á vegi hans verða telja að hér sé snjall leikari á ferð og hann vekur hvarvetna hrifningu fyrir sannfærandi gervi og ótrúlega innlifun í hlutverk Foringjans. Fljótlega kemst hann í kynni við framleiðendur skemmtiþáttar í sjónvarpinu og fær þar tækifæri til að láta ljós sitt skína. Hann slær í gegn og myndskeið með ræðuhöldum hans slá öll áhorfsmet á YouTube. Leiðin virðist greið á ný …
Háðsádeilan um Hitler í nútímanum kom út í Þýskalandi árið 2012 og er orðin að margfaldri metsölubók þar og víðar. Timur Vermes er fæddur árið 1967 í Nürnberg og Aftur á kreik er hans fyrsta skáldsaga.“
