Nýja Batman kvikmyndin, með Robert Pattinson í titilhlutverkinu, hlutverki Leðurblökumannsins, hefur fengið nýtt vinnuheiti, og ættu aðdáendur því að sperra eyrun.
Samkvæmt því sem fram kemur á vefsíðu Metro þá heitir myndin nú Vengeance, en þar sem fáar opinberar fregnir er að hafa úr herbúðum Batman, þá er ánægjulegt að fá þó þennan mola.
Eins og segir á Metro eru vinnuheiti gjarnan notuð meðan á tökum bíómynda stendur til að fela hið raunverulega heiti myndarinnar, eða til að hjúpa myndina leynd á tökutíma.
Mögulega hefur endanlegt heiti ekkert með Vengeance að gera, en eins og fyrr sagði, er lítið af upplýsingum að hafa, nema fregnir af leikaravali.
Auk Pattinson þá hefur Zoe Kravitz verið ráðin í hlutverk Kattarkonunnar.
Eins og segir á vef Metro kemur ekki á óvart að Vengeance sé notað sem vinnuheiti, því hugtakið, sem þýðir hefnd, eða jafnvel heiftarleg hefnd, er ekki óþekkt í heimi Batman.
