Í tilefni þess að kvikmyndin Argo eftir Ben Affleck, hlaut þrenn óskarsverðlaun í nótt, þar á meðal sem besta myndin, munu SAMbíóin Egilshöll taka myndina aftur til sýningar frá og með morgundeginum, 26. febrúar, í takmarkaðan tíma.
Það er Ben Affleck eins og fyrr segir sem leikstýrir þessari gæðamynd, ásamt því að framleiða og leika aðalhlutverkið, en myndin er byggð á sannsögulegum atburðum.
Sjáðu stikluna úr myndinni hér fyrir neðan:
Söguþráður myndarinnar er þessi: Þegar sex bandarískum sendiráðsmönnum tókst að komast undan uppreisnarmönnum í Íran og fela sig í kanadíska sendiráðinu var sett í gang björgunaraðgerð sem sannaði að raunveruleikinn er oft ótrúlegri en skáldskapurinn.
Argo er byggð á dagsannri sögu sem að mestu leyti gerist í Íran rétt eftir að íranskir uppreisnarmenn hertóku bandaríska sendiráðið í Teheran þann 4. nóvember árið 1979.
Um leið og uppreisnarmennirnir lögðu sendiráðið undir sig tókst sex starfsmönnum þess að flýja og komast í skjól í kanadíska sendiráðinu. Sú hætta var fyrir hendi að ef uppreisnarmenn kæmust að því hvar sexmenningarnir væru myndu þeir taka þá af lífi.
Stjórnendur í ríkisstjórn Bandaríkjanna töldu það því bráðnauðsynlegt að aðstoða sitt fólk áður en það yrði of seint. Vandamálið var auðvitað hvernig?
Lausnin fólst í sérlega áhættusamri aðgerð þar sem FBI-menn voru sendir til Írans dulbúnir sem kvikmyndagerðarmenn. Í þeim blekkingarleik var síðan allt lagt undir ..
Aðalhlutverk: Ben Affleck, Bryan Cranston, John Goodman, Alan Arkin, Tate Donovan, Victor Garber og Clea Duvall
Leikstjórn: Ben Affleck
Sýningarstaðir: Sambíóin Egilshöll
Aldurstakmark: 12 ára
Fróðleiksmolar til gamans:
• Heiti myndarinnar, Argo, er í raun heiti myndarinnar sem björgunarmennirnir þykjast vera að gera í Íran en er ekkert annað en skjólið fyrir aðgerðir þeirra. Þess má geta að Argo er byggð á sögunni Master of Disguise eftir Tony Mendez, sem Ben Affleck leikur.
• Til að ljá myndinni andrúmsloft síns tíma ákvað Ben Affleck að taka hana upp á venjulega filmu og stækka síðan hvern ramma til að ná þeirri myndupplausn sem notuð var í kvikmyndafilmum árið 1979.
