Stjörnurnar í Hollywood eiga það til að fá sér of mikið neðan í því eins og annað fólk, sérstaklega þegar stórhátíðir ganga í garð.
Kvikmyndaleikarinn Josh Brolin var handtekinn í Kaliforníu rétt fyrir miðnætti þann 1. janúar sl. samkvæmt vefmiðlinum The Huffington Post.
Leikarinn var handtekinn fyrir ölvun á almannafæri og stungið í steininn. Honum var síðan sleppt gegn tryggingu morguninn eftir, eða kl. 7.14 um morguninn, samkvæmt lögreglunni í Santa Monica í Kaliforníu.
Brolin, sem er 44 ára gamall, og er giftur leikkonunni Diane Lane, greiddi 250 dali í tryggingafé, en engir frekari eftirmálar verða af handtökunni.
Samkvæmt fréttaveitunni TMZ þá var leikarinn að skemmta sér með tveimur góðum vinum sínum, og endaði á því að „skemmta sér hreinlega of mikið.“