Síðustu óáteknu VHS spólurnar eru nú til sölu í nokkrum raftækjabúðum landins, samkvæmt frétt í Morgunblaðinu í dag. Í fréttinni segir að þær raftækjaverslanir sem blaðið ræddi við séu löngu hættar að selja slíkar spólur, en nokkrir pakkar hafi fundist baka til hjá Sjónvarpsmiðstöðinni í Síðumúla, en þar var um að ræða 120 mínútna og 180 mínútna spólur.
Þetta eru vafalaust sorgarfréttir fyrir marga, enda eiga margir hlýjar minningar frá tíma VHS spólanna, þar sem hægt var að taka upp efni og horfa á það síðar.
Í fréttinni kemur fram að þegar þessar síðustu spólur hafi selst þá verði lagerinn ekki endurnýjaður, enda sé Funai Electric að hætta framleiðslu VHS í lok mánaðarins.
Ennfremur segir í Morgunblaðinu að Elko hafi selt síðustu VHS spólurnar sínar í lok síðasta mánaðar, og síðasta VHS tækið hafi selst í lok síðasta árs. „Spólurnar kláruðust í byrjun mánaðarins þegar viðskiptavinur gekk að kassanum með síðasta pakkann af 240 mínútna spólum,“ segir að endingu í fréttinni.
