Rosemarie DeWitt er um það bil að landa aðalkvenhlutverkinu í myndinni Kill The Messenger, eða Dreptu sendiboðann, í lauslegri íslenskri þýðingu, samkvæmt Deadline kvikmyndavefnum.
Myndin er sannsögulegur spennutryllir og fjallar um blaðamanninn Gary Webb, sem starfaði á dagblaðinu San Jose Mercury News. Hann framdi sjálfsmorð eftir að hann lenti í ófrægingarherferð í kjölfar þess að hann tengdi leyniþjónustu Bandaríkjanna, CIA, við áætlun um að láta Contraskæruliða í Nicaragua fá vopn og flytja inn kókaín til Kaliforníu.
Jeremy Renner mun leika Webb og leikstjóri er Michael Cuesta. Handrit skrifar Peter Landesman.
