Fimmta mynd Ben Stillers sem leikstjóra, The Secret Life of Walter Mitty, er nú í öðru sæti yfir vinsælustu myndir í bíó á Íslandi eftir að hafa verið í sýningum í þrjár vikur. Myndin fær 7.6 í einkunn á IMDb, hæsta einkunn sem mynd sem hann leikstýrir hefur fengið. Zoolander fær til samanburðar einungis 6.6 og Tropic Thunder 7.0. Hún fær hinsvegar ekki jafn mikið lof gagnrýnenda, og fær aðeins 48% á Rotten Tomatos.
Eins og Íslendingar vita var stór hluti myndarinnar tekin upp á Íslandi. Ekki fyrsta Hollywood myndin sem gerir það, en í fyrsta sinn síðan Die Another Day var tekin upp hér þá gerist myndin í raun og veru á Íslandi, ólíkt t.d. Prometheus þar sem Ísland er önnur pláneta, Oblivion þar sem Ísland á að vera Bandaríkin eftir að geimverur eyðileggja jörðina, Himalayjafjöll í Batman Begins og svona mætti lengi telja. En í Walter Mitty leikur Ísland ekki aðeins sjálfan sig, heldur líka einmitt Himalayjafjöllin og einnig Grænland.
Nú hafa ferðaþjónustuaðilar loksins tekið við sér og byrjað að bjóða upp á ferðir um tökustaði á Íslandi. Ein ferðin er tileinkuð Walter Mitty, en ferðin hefur verið gagnrýnd fyrir að sleppa algjörlega Seyðisfirði. Ég tók hinsvegar fljótt eftir að mun fleiri tökustöðum var sleppt. Hér ætla ég að fara yfir alla þá tökustaði sem koma fyrir í myndinni og reyna að bera kennsl á staðsetninguna. Við vörum við að sumar myndirnar hér fyrir neðan gætu spillt söguþræðinum fyrir þeim sem ekki hafa séð myndina.
Þetta er ein draumasena Walter Mitty í byrjun myndarinnar. Mér finnst reyndar svolítið líklegt að þetta sé annað hvort tölvugert fjall eða að þetta sé alls ekki á Íslandi. En ég ákvað samt að hafa það með.
Þegar Walter Mitty flýgur til Grænlands þá flýgur Air Greenland flugvélin yfir Brandsvog við Djúpavog í rétt augnablik.
Svo verður honum litið út um gluggann og sér yfir Álftafjörð.
Næst sér hann Stykkishólm, sem mun koma meira við sögu síðar. Ísjökunum hefur verið bætt við í Photoshop.
Flugvöllurinn í Nuuk er í raun og veru Hornafjarðarflugvöllur hjá Höfn.
Walter Mitty keyrir af stað frá flugvellinum, en ég hef ekki áttað mig á hvar þetta er.
Hann kemur við í Nuuk og hittir Ólaf Darra á bar. Þetta er að sjálfsögðu Stykkishólmur.
Eftir ævintýralega þyrlu og bátsferð, sem var tekin upp fyrir utan Garð er Walter Mitty loksins kominn til Íslands. Fyrsti bærinn sem hann kemur að er Grundafjörður, en þar stelur hann hjóli.
Uppfært: Hann hjólar framhjá þurrkhúsi. Þökk sé Guðna og Steinari í athugasemdunum hér fyrir neðan náðist að bera kennsl á að það er við bæinn Berserkseyri á leiðinni frá Grundafirði til Stykkilshólmar.
Hann hefur hjólað þvert yfir landið og er kominn undir Vestrahorn í Hornafirði.
Svo hjólar hann framhjá þessum sveitabæ.
Þegar hann fær símtal frá eHarmony er hann kominn á Nesjavallaveg.
Og dettur all svakalega fyrir framan tvær kindur.
Hann skilur hjólið eftir og hleypur yfir gömlu Þjórsárbrúnna.
Þessa staðsetningu þekki ég ekki.
Svo er hann búinn að hlaupa alla leið að skíðaskálanum í Hveradölum þar sem hann hittir þrjá íslenska stráka og fær hjólabretti í skiptum fyrir Stretch Armstrong.
Hann hleypur með hjólabrettið upp á Fjarðarheiði.
Hann fer á hjólabrettinu niður brekkuna og að Seyðisfirði. Fyrsta ferðin sem er eins og hún er í raunveruleikanum. Seyðisfjörður er í raun og veru fyrir neðan Fjarðarheiði. En Eyjafjallajökull er auðvitað ekki fyrir ofan Seyðisfjörð, sem gýs í þessu atriði.
Gunnar Helgason bjargar Walter Mitty með naumindum og skuttlar honum í Borgarnes þar sem bakaríinu hefur verið breytt í Papa John’s veitingastað.
Walter Mitty flýgur aftur til Bandaríkjana og flettir upp Himalayafjöllunum. Veit ekki hvaða fjall þetta er. En það á að vera í Himalayjafjöllunum í Afghanistan.
Hann fer til Afghanistan. En þetta er í raun Breiðamerkursandur.
Svo keyrir hann upp einhvern fjallaveg. Líklega við rætur Vatnajökuls.
Hér er annað atriði sem gæti verið næstum hvar sem er á Íslandi.
Þetta er að sjálfsögðu Skógarfoss.
Hann fær blessun frá leiðsögumanninum á Breiðamerkursandi, með Fjallsjökul í baksýn.
Hann gefur Afghönskum stríðshöfðingum köku sem hálfgerðan vegtoll. Hluti af myndinni var tekin upp í Kálfafellsdal. Þetta atriði gæti hafa verið tekið upp þar.
Hér á eftir koma nokkur stutt atriði sem ég veit ekki hvar voru tekin upp, en mörg þeirra voru líklega tekin upp í Kálfafellsdal.
Hér finnur Walter Mitty vin sinn, Sean. Ekki viss hvar þetta er tekið, þó ég viti að þetta sé við rætur Vatnajökuls. Fjallið í baksýn gæti verið tölvugert.
Síðasta atriðið sem tekið var upp á Íslandi er fótboltaleikur á Breiðamerkursandi. Rétt hjá Jökulsárlóni.
Það er gaman að sjá hvernig Walter Mitty fór þvers og kruss um landið. Þetta er daglegt brauð í Hollywood, en þegar maður þekkir staðina svona vel þá er það ennþá meira áberandi. Hér er kort af ferðalögunum. Glöggir lesendur taka eftir að Garðinum var sleppt, það er af því að öll þau atriði voru tekin upp út á sjó.
Er einhver mynd sem tekin hefur verið hér á landi sem þú hefðir áhuga á að fá grein um? Láttu okkur vita í athugasemdunum hér fyrir neðan.
