Aðdáendur teiknimyndarinnar Frozen eru mis umburðarlyndir gagnvart þeim sem líkar ekki við myndina. Sumir vilja halda myndinni fyrir sjálfan sig, en aðrir vilja breiða út upplifun sína af myndinni.
Þrítug kona í Japan virðist ætla að taka þetta skrefinu lengra og hefur hún sótt um skilnað við eiginmann sinn vegna þess að honum þótti myndin einfaldlega ekki góð.
Samkvæmt japönsku síðunni Kikonsha no Hakaba þá fór konan nokkrum sinnum á myndina, en maður hennar neitaði að koma með því hann hafði ekki áhuga á söguþræðinum. Á endanum lét hann undan og fór á myndina. Eftir að hann sá hana þá skildi hann ekki afhverju hún er svona vinsæl.
Konan á að hafa óskað eftir skilnaði því að hennar mati er eitthvað að manni hennar fyrst að honum finnst myndin ekki góð. Hjónin höfðu verið saman í sex ár áður en myndin kom upp á milli þeirra, en samkvæmt japönsku vefsíðunni þá býr konan núna í foreldrahúsum.
