Fuglaborgin frumsýnd á föstudag

Ný teiknimynd með íslensku tali, Fuglaborgin, eða Zambesia eins og hún heitir á ensku, verður frumsýnd á föstudaginn í 2-D og 3-D í Smárabíói, Laugarásbíói og Borgarbíó Akureyri.

Í tilkynningu frá Senu segir að hér sé á ferðinni bíóskemmtun fyrir alla fjölskylduna.

Í myndinni er sögð saga af ungum fálka sem hefur alist upp í einangruðu umhverfi en fær nóg af einsemdinni. Hann yfirgefur föður sinn og ferðast til fuglaborgarinnar Zambezíu þar sem hann vill búa sér líf. En hann kemst brátt að því að það getur verið erfiðara að búa í stóru samfélagi en að bjarga sér úti í náttúrunni og það er ekki fyrr en mikil ógn steðjar að borginni að honum skilst að eina leiðin sem vert er að lifa lífinu er í samfélagi við aðra fugla.