Framleiðslufyrirtækið Warner Bros staðfesti í ágúst síðastliðinn að leikarinn Ben Affleck hafi tekið að sér hlutverk Batman í framhaldsmynd Man of Steel. Margir veltu fyrir sér hvort þessi ákvörðun væri rétt og hófust margar vangaveltur meðal aðdáenda Batman um allan heim.
Affleck er þó hvergi ókunnugur ofurhetjum og lék hann m.a. titilhlutverkið í kvikmyndinni Daredevil árið 2003. Affleck lék einnig Superman-leikarann George Reeves í kvikmyndinni Hollywoodland, sem var gerð árið 2006.
Í dag var fyrsta myndin af Ben Affleck í hlutverki Batman opinberuð. Á myndinni stendur hann við hlið nýja Batmanbílsins, eins og má sjá hér að neðan.
Tökur á framhaldsmyndinni, sem hefur fengið nafnið Batman vs. Superman, hefjast í Detroit í Bandaríkjunum á næstu vikum. Myndin er svo áætluð í kvikmyndahús þann 6. maí, 2016.
