Gamanleikarinn Ricky Gervais á nú í viðræðum um að leika í nýju Prúðuleikaramyndinni, samkvæmt vefsíðunni The Hollywood Reporter.
Ef af verður, þá mun Gervais leika svipað hlutverk og Jason Segel lék í fyrri myndinni, sem er aðal „mannlega“ hlutverkið, mitt í hópi Prúðuleikaranna.
Eins og sést í myndbandinu hér að ofan þá hefur Gervais leikið áður á móti brúðum.
Nú þegar hefur Ty Burrell úr Modern Family ákveðið að leika í myndinni, sem gerist í Evrópu í þetta sinn, en Burrell mun leika hlutverk lögreglumanns í alþjóðalögreglunni Interpol.
Ekki liggur nákvæmlega fyrir hvert hlutverk Gervais gæti orðið, enda er söguþráðurinn enn að mestu á huldu. Það sem er vitað á þessari stundu er að Prúðuleikararnir komast eitthvað í kast við lögin, og dularfullt rússneskt tálkvendi kemur við sögu. Enn á eftir að ráða í það hlutverk í myndinni.
