Breski grínistinn og leikarinn Ricky Gervais mun fara með hlutverk sölustjórans David Brent á ný í nýrri kvikmynd sem BBC mun framleiða. Margir muna eftir persónunni úr gamanþáttunum The Office sem hófu göngu sína árið 2001 og voru sýndir til ársins 2003.
Í myndinni mun Brent reyna fyrir sér sem tónlistarmaður, en það hefur verið draumur hans frá upphafi að gera það gott í þeim geira. Myndin mun heita Life on the Road og vísar þar með í ferðalag hans um England í myndinni.
Gervais hefur nokkrum sinnum snúið aftur í hlutverki Brent eftir að þættirnir hættu göngu sinni. Á síðasta ári var Brent t.d. með gítarkennslutíma á Youtube í tilefni grínviku. Hér að neðan má sjá myndband þar sem Brent fer einmitt með lagið Life on the Road, sem fjallar um starf hans sem sölumaður hreingerninga- og klósettvarnings.
