Kvikmyndaverið Warner Bros hefur ákveðið að fresta framhaldi Godzilla um níu mánuði.
Myndin verður frumsýnd vestanhafs 22. mars 2019 í leikstjórn Gareth Edwards en hún átti áður að koma fyrir sjónir almennings 8. júní 2018. Þar átti hún að etja kappi við næstu Transformers-mynd í miðasölunni en ekkert verður af þeim bardaga, samkvæmt frétt Deadline.
Í staðinn keppir hún við Amusement Park, sem verður frumsýnd sömu helgi 2019, með Matthew Broderick og Jennifer Garner í aðalhlutverkum.
Ekki mun langur tími líða þar til skrímslið mætir aftur á hvíta tjaldið því Godzilla vs Kong verður frumsýnd 29. maí 2020. Margir bíða spenntir eftir þeirri rimmu, enda mætast þar stálin stinn.