Kvikmyndin Hrútar eftir Grím Hákonarson verður frumsýnd hér á landi í dag. Myndin vann til aðalverðlauna í Un Certain Regard-keppninni á kvikmyndahátíðinni í Cannes nýverið.
Hrútar fjallar um tvo sauðfjárbændur á sjötugsaldri, bræðurna Gumma og Kidda, sem búa hlið við hlið í afskekktum dal á Norðurlandi. Fjárstofn þeirra bræðra þykir einn sá besti á landinu og eru þeir margverðlaunaðir fyrir hrútana sína. Þrátt fyrir að deila sama landi og lífsviðurværi þá hafa bræðurnir ekki talast við í fjóra áratugi.
Þegar riðuveiki kemur upp í dalnum grípur um sig mikil örvænting á meðal bændanna þar. Yfirvöld ákveða að skera niður allt sauðfé til þess að sporna við útbreiðslu sjúkdómsins. Bræðurnir standa frammi fyrir því að missa það sem er þeim kærast og grípa til sinna ráða.
Myndin verður til sýninga í Smárabíó, Laugarásbíó, Háskólabíó og Borgarbíó Akureyri.
