Paramount Pictures hafa sent frá sér fyrstu stikluna úr framhaldsmyndinni um ofurnjósnarann Xander Cage, xXx: The Return of Xander Cage, með Vin Diesel í titilhlutverkinu, og þau Samuel L. Jackson, Conor McGregor, Tony Jaa, Deepika Padukone, Nina Dobrev, Ruby Rose, Toni Collette, Donnie Yen og Ariadna Gutierrez í öðrum helstu hlutverkum.
Leikstjóri er I am Number Four leikstjórinn D.J. Caruso.
Myndin er þriðja myndin um Xander Cage, og eins og sjá má af stiklunni þá er enginn venjulegur maður hér á ferð – í lauslegri þýðingu: „Við þurfum mann sem getur farið inn í fellibyl og komið út hinum megin eins og hann hafi verið dálítill andvari.“
Í myndinni kemur Cage úr sjálfskipaðri útlegð og á nú í höggi við illmennið Xiang og hans teymi, en markmið Cage er að endurheimta hið að því er virðist óstöðvandi vopn sem þekkt er undir nafninu Box Pandóru.
Xander fær í lið með sér álíka hetjur og hann er sjálfur, og á endanum eru samsæri við hvert fótmál sem snerta ríkisstjórnir margra landa.
Myndin kemur í bíó hér á Íslandi 20. janúar 2017.
Sjáðu hasarpakkaða stikluna hér fyrir neðan:
