Konur eru í meirihluta þeirra leikstjóra sem keppa um Gullna lundann, aðalverðlaun RIFF, Alþjóðlegar kvikmyndahátíðar í Reykjavík, í ár, eða sex talsins. Verðlaunin verða afhent á morgun, laugardag.
Veitt verða sex verðlaun á RIFF í ár. Í flokknum Vitranir tefla ellefu nýir leikstjórar fram sinni fyrstu eða annarri mynd í fullri lengd og keppa um aðalverðlaun RIFF, Gullna lundann . Í dómnefndinni í ár sitja Jonas Holmberg, listrænn stjórnandi kvikmyndahátíðarinnar í Gautaborg, Grímur Hákonarson leikstjóri og Yrsa Sigurðardóttir rithöfundur.
Ljósmynd úr The Giant eftir Johannes Nyholm
Þá verða verða umhverfis- og mannréttindaverðlaun RIFF veitt fyrir bestu myndina í flokknum Önnur framtíð og sitja Brian D. Johnson, formaður samtaka kvikmyndagagnrýnenda í Toronto, Lilja Snorradóttir framleiðandi og Þóra Tómasdóttir ritstjóri í dómnefndinni.
Ljósmynd úr Oscuro Animal eftir Felipe Guerrero
Þrenn stuttmyndaverðlaun verða veitt, fyrir bestu íslensku stuttmyndina, bestu erlendu stuttmyndina og Gullna eggið kemur í hlut bestu myndarinnar á Talent Lab . RÚV kaupir sýningarrétt að bestu íslensku stuttmyndinni fyrir 500.000 kr, auk þess sem hún hlýtur viðurkenningu til minningar um Thor Vilhjálmsson. Í dómnefnd stutmynda sitja Þóranna Sigurðardóttir kvikmyndagerðarmaður, Kate Hide hjá Hanway Films í London og Ragnar Hansson leikstjóri.
Þá verða áhorfendaverðlaun RIFF og mbl.is veitt í kvöld, fyrir bestu myndina í flokki heimildamynda og flokknum Fyrir opnu hafi .
