Eins og við höfum greint frá hér á síðunni þá hefur leikarinn Shia LaBeouf hagað sér undarlega á köflum síðustu misserin, og jafnvel komist í kast við lögin, eins og sagt var frá hér á dögunum.
Upplýsingafulltrúi leikarans sendi kvikmyndasíðunni The Wrap yfirlýsingu í dag vegna fregna annarra vefmiðla um að leikarinn hefði skráð sig inn á meðferðarstofnun til að fá hjálp við áfengisfíkn. Í tilkynningunni segir að missagt sé að leikarinn hafi skráð sig í meðferð, slíkt sé ekki rétt, en hann hafi þó leitað sér hjálpar.
Í tilkynningunni segir að LaBeouf hafi tekið fyrsta skrefið í átt til bata, með því að viðurkenna að hann eigi við vandamál að etja.
Jafnframt segir að „leikarinn skilji að atburðir undanfarinna daga séu afleiðing af stærra heilsufarsvandamáli, og hann hafi tekið fyrsta af mörgum nauðsynlegum skrefum í átt að bata. Ekki verður meira sagt um málið að sinni.“