Stuttmyndin Málarinn í leikstjórn Hlyns Pálmasonar var valin besta danska stuttmyndin á nýafstaðinni alþjóðlegri kvikmyndahátíð í Óðinsvéum. Með sigrinum er stuttmyndin komin í forval fyrir bestu stuttmyndina á Óskarsverðlaununum, að því er fram kemur í frétt frá Kvikmyndamiðstöð Íslands.
Málarinn er útskriftarverkefni Hlyns frá danska kvikmyndaskólanum.
Með hlutverk málarans fer Ingvar E. Sigurðsson.
Myndin, sem er 30 mínútna löng, fjallar um vinsælan myndlistarmann sem lifir mjög einangruðu lífi. Myndverkin eru hans drifkraftur í lífinu og hann veit ekki hvernig hann á að taka á því þegar sonur hans kemur óvænt í heimsókn. Skyndilega er hann í miðjunni á óreiðukenndu ástandi, sem setur bæði hann og verk hans úr jafnvægi.