Mörgum hlakkaði til að sjá írska töffarann Liam Neeson í The Hangover Part II en því miður mun ekki af því verða. Hlutverkið sem Neeson hreppti þegar vandræðagemsinn Mel Gibson var látinn fjúka hefur nú farið í hendur Nick Cassavetes.
Stutt er í að myndin verði frumsýnd og því óvenjulegt að leikara sé skipt út á þessum tímapunkti. Leikstjórinn, Todd Phillips, útskýrir málið þannig að klippa hafi þurft atriði sem fylgir því atriði sem Neeson lék í. Þurfti því að breyta atriði Neesons og hafi leikarinn verið beðinn að koma og taka það upp á ný. Því miður var Neeson upptekinn við tökur á Clash of the Titans 2 og sá sér ekki fært að mæta.
„Ég hringdi í Nick og bað hann að koma og taka atriðið upp fyrir mig. Hann mætti og stóð sig frábærlega, svo það er atriði sem fer í myndina.“ sagði Phillips.
