Quentin Tarantino og Johnny Depp hafa lengi haft áhuga á að starfa saman. Á óskalista leikstjórans yfir draumaleikara í myndum hans eru einnig Meryl Streep og Michael Caine.
„Við höfum mikinn áhuga á að starfa saman. Við höfum talað um það í mörg ár,“ sagði Tarantino um mögulegt samstarf við Depp í viðtali við Charlie Rose. „Ekki það að við höfum hist og talað um þetta ár eftir ár heldur bara af og til.“
„Við erum miklir aðdáendur hvor annars en rétta persónan þarf að vera til staðar. Ég þarf að búa til réttu persónuna sem ég myndi telja að hentaði Johnny. Og ef hann samþykkir tillöguna þá látum við verða af þessu. Þá verður þetta töfrum líkast,“ sagði Django Unchained-leikstjórinn. „Ég hef ekki enn samið rétta hlutverkið fyrir Johnny Depp. Kannski gerist það einhvern tímann, kannski ekki. Það kemur í ljós.“
