Universal kvikmyndaverið er búið að ákveða frumsýningardag fyrir myndina sem Legendary Entertainment er að gera upp úr hinum gríðarlega vinsæla tölvuleik Blizzard Entertainment, World of Warcraft. Frumsýnt verður rétt fyrir jól 2015, nánar tiltekið 18. desember.
Eins og við sögðum frá á dögunum þá eiga Legendary í viðræðum við leikarana Colin Farrell og Paula Patton, en einnig eru þau Paul Dano, Travil Fimmel, Anson Mount og Anton Yelchin í sigtinu hjá framleiðendum.
Warcraft verður fyrsta myndin sem Universal vinnur með Legendary, samkvæmt nýjum dreifingar- og fjármögnunarsamningi fyrirtækjanna.
Duncan Jones (Source Code) leikstýrir myndinni eftir handriti Charles Leavitt og Jones sjálfs.