Universal kvikmyndaverið er búið að staðfesta að rumurinn Vin Diesel muni ekki snúa aftur til þess að leika í framhaldinu af kvikmyndinni The Fast and the Furious. Hann mun hafa beðið um 20 milljónir dollara, sem var mun meira en Universal var tilbúið til þess að reiða af hendi. Universal var reyndar búið að búa sig undir þennan möguleika með því að láta handritshöfundana skrifa tvö handrit, annað þar sem Diesel karakterinn kemur við sögu og annað þar sem hvergi sést tangur né tetur af honum. Nú þegar Vin Diesel er horfinn úr myndinni, er leikstjóri fyrri myndarinnar, Rob Cohen, það líka. Hann var búinn að gera Universal það ljóst að hann kæmi ekki nálægt framhaldinu nema Vin Diesel gerði það líka. Nú þarf Universal að finna annan leikstjóra til þess að fylla í skarðið. Hins vegar mun Paul Walker aftur fara með aðalhlutverkið. Í framhaldinu er búið að reka persónu hans, Brian O´Connor, tímabundið úr lögreglunni. Hann fær hins vegar tækifæri á því að bæta ráð sitt þegar honum er komið fyrir aftur undir fölsku flaggi, nú í Miami. Enn og aftur á hann að leysa eitthvert mál sem snýr að kappakstri og aflmiklum bílum.