Ný heimildamynd Friðriks Þórs Friðrikssonar, Sjóndeildarhringur hefur verið valin til þátttöku á TIFF Docs hluta hinnar virtu alþjóðlegu kvikmyndahátíðar í Toronto. Um er að ræða heimsfrumsýningu myndarinnar. Hátíðin fer fram frá 10. – 20. september.
Þetta kemur fram í tilkynningu frá Kvikmyndamiðstöð Íslands.
Sjóndeildarhringur fjallar um listmálarann Georg Guðna Hauksson, sem lést aðeins fimmtugur að aldri árið 2011. Á fyrstu einkasýningu hans í Nýlistasafninu í Reykjavík árið 1985 birtist einstök sýn á íslenskt landslag í fjallamyndum hans. Sýningin markaði upphafið að ferli Georgs Guðna sem frumkvöðuls í endurreisn landslagsmálverksins.
Sjóndeildarhring er leikstýrt af Friðrik Þór Friðrikssyni og Bergi Bernburg. Friðrik Þór framleiðir einnig myndina fyrir framleiðslufyrirtækið Sjóndeildarhring. Stjórn kvikmyndatöku og klipping er í höndum Bergs Bernburg og meðframleiðslufyrirtæki er hið danska ResearchGruppen.
Myndin verður tekin til sýninga í íslenskum kvikmyndahúsum með haustinu.
