The Tale of Despereaux (2008)

Ævintýri Despereaux er teiknimynd um litlu músina Despereaux, en hann er ólíkur flestum öðrum músum. Despereaux vill nefnilega ekki húka í holum og læðast meðfram veggjum í myrkrinu, heldur sýnir hugrekki og vilja til að verða mikil hetja. Hann vill líka miklu frekar lesa bækur heldur en að éta þær, eins og aðrar mýs gera. Því gengur honum illa að þrífast í samfélagi músanna, sem öllum er kennt að lifa í ótta við hinn stóra heim í kringum sig. Despereaux heldur því upp í mikið ævintýri, og ekki líður á löngu þar til hann hittir prinsessuna Pea. Prinsessan hræðist Despereaux í fyrstu, en þegar hún kemst yfir það bindast þau sterkum vinaböndum. Brátt eru þau farin að hjálpa hvort öðru, en bæði berjast þau við að breyta hlutum í ríkjum sínum, en tekst þeim að færa mönnum og músum líf og gleði eftir langan tíma ótta og sorgar?