Attack the Block (2011)

Attack the Block gerist í og í kringum stórt fjölbýlishús í suðurhluta London þann 5. nóvember, á Guy Fawkes-deginum. Í húsinu, sem er í fátækrahverfi, búa nokkrir unglingsmeðlimir götugengis á svæðinu, þeir Moses, Pest, Dennis, Jerome og Biggz. Þeir víla ekki fyrir sér að ráðast á og ræna saklausa vegfarendur, en þegar þeir eru í miðju kafi við að ræna hjúkrunarkonuna Sam kemur eldhnöttur ofan af himnum og lendir með miklum látum í hverfinu. Gengið fer á stúfana og sér að það sem hrapaði til jarðar er lítið geimskip með veru um borð. Hún virðist illskeytt en unglingarnir ná að drepa hana áður en hún veldur skaða. Vandræðin byrja hins vegar þegar fleiri eldhnettir lenda í hverfinu, hver og einn með blóðþyrsta geimveru um borð. Verur þessar eru með þeim hættulegustu sem til hafa verið í vetrarbrautinni, en þær hafa aldrei komið til Suður-London áður.