The Impossible (2012)

Á annan dag jóla árið 2004 olli jarðskjálfti í Indlandshafi gríðarlegri flóðbylgju sem á endanum kostaði yfir 227.000 manns lífið í 14 löndum. Hér er sögð sönn og mögnuð saga fimm manna fjölskyldu sem upplifði þessar náttúruhamfarir. Mikil áhersla hefur verið lögð á að endurskapa atburðarásina á sem sannastan hátt, ekki síst hvernig það var að vera á staðnum þegar flóðbylgjan, sem sums staðar náði yfir 30 metra hæð, skall á strandlengjunni án nokkurrar viðvörunar. Hjónin Henry og Maria eru ásamt sonum sínum þremur, þeim Simoni, Thomasi og Lucasi, stödd í sumarleyfisparadís í Tælandi og hefur bæði haft það gott og skemmt sér vel það sem af er ferðinni. Um tíuleytið að morgni 26. desember er fjölskyldan ásamt fjölda annarra að njóta lífsins við hótelið sem þau gista á þegar andrúmsloftið breytist skyndilega. Einhver óáþreifanleg ógn er í lofti. Örskömmu síðar skellur há og kraftmikil flóðbylgjan á ströndinni, tætir í sig allt sem fyrir verður og hrífur með sér fólk og brak. Skelfingin var nánast ólýsanleg og við tók margra mínútna lífsbarátta þar sem hver og einn gat lítið annað gert en að reyna að komast af í ægivaldi flóðsins. Og þegar allt var um garð gengið og flóðbylgjan hafði sjatnað blasti lítið betra við ...