Robert Downey Jr., sem hvað þekktastur er nú síðari ár fyrir að leika ofurhetjuna Iron Man, á nú von á sínu öðru barni. Eiginkona leikarans til sex ára, Susan Downey, er þunguð af sínu fyrsta barni, og á að eiga í febrúar 2012.
Downey, sem er 46 ára gamall, á fyrir 17 ára son, Indio, með fyrstu konu sinni Deborah Falconer.
Downey hefur gengið allt í haginn síðan honum tókst að rífa sig upp úr ruglinu og yfirvinna áfengis- og vímuefnafíkn sína fyrir sex árum síðan.
Hann tekur edrúmennskunni þó ekki sem gefinni: „Þegar ég horfi til baka þá hugsa ég; guð minn góður, ég gæti verið dauður. Ég hefði getað grillað svo gjörsamlega á mér hausinn. Þetta er svo sannarlega víti til varnaðar,“ sagði leikarinn við tímaritið Playboy í október á síðasta ári. „Og ég gæti enn átt eftir að falla,“ sagði Downey, og bætti við að velgengni bæði í starfi og í einkalífi hittu nú hvorutveggja á sama tímann.
