Ný íslensk kvikmynd, Snjór og Salóme, verður frumsýnd á föstudaginn næsta, þann 7. apríl, í Smárabíói, Háskólabíói og Borgarbíói Akureyri. Leikstjóri myndarinnar er Sigurður Anton Friðþjófsson.
Samkvæmt tilkynningu frá Senu er hér að ferðinni stórskemmtileg saga um óvenjulegan ástarþríhyrning. Þau Salóme og Hrafn hafa átt í on/off-sambandi í fimmtán ár og leigt saman íbúð. Þegar Hrafn barnar aðra konu, Ríkeyju, og hún flytur inn breytist allt og Salóme þarf að endurmeta stöðu sína frá grunni.
Sjáðu stiklu úr myndinni hér fyrir neðan:
Sigurðar Anton á að baki myndirnar Webcam og Ísabellu. Eins og í Webcam eru það þær Anna Hafþórsdóttir og Telma Huld Jóhannesdóttir sem fara með tvö stærstu kvenhlutverkin en í hlutverki Hrafns er Vigfús Þormar Gunnarsson.
„Margar eftirminnilegar persónur koma fyrir og hafa ólík áhrif á atburðarásina sem gerir myndina að raunsæjum og athyglisverðum glugga inn í líf þessara ungu Reykvíkinga.“
Helstu leikarar: Anna Hafþórsdóttir, Telma Huld Jóhannesdóttir, Vigfús Þormar Gunnarsson, Guðmundur Snorri Sigurðarson, Guðjón Davíð Karlsson, Gunnar Helgason og Ólafía Hrönn Jónsdóttir.
