Lengi vel var hætta á að nauðgunarákæra á franska kvikmyndaleikstjórann Luc Besson yrði til þess að nýjasta spennutrylli hans, Anna, yrði endanlega pakkað ofaní skúffu, en nú þegar málinu hefur verið vísað frá, nánar tiltekið í febrúar sl., eftir níu mánaða rannsókn, gæti útlitið verið bjartara fyrir myndina.
![](https://kvikmyndir.dv.is/wp-content/uploads/2019/04/xanna.jpg.pagespeed.ic.tBrvLb1zCF.jpg)
Nokkrar aðrar konur hafa þó komið fram opinberlega og sakað leikstjórann um kynferðislega áreitni, en Lionsgate framleiðslufyrirtækið virðist samt sem áður vera klárt í að taka myndina af hillunni og hefja kynnningar á henni.
Af fyrstu stiklunni að dæma er um að ræða dæmigerða Besson spennumynd. Aðlaðandi kvenpersóna og harðsnúinn leigumorðingi er í forgrunni, persóna í ætt við Nikita eða Lucy, úr samnefndum eldri myndum Besson. Ómögulegt er hinsvegar að spá um það hvernig kvikmyndagestir taka myndinni, og hversu mikil áhrif ákæran og aðrar ásakanir hafa á fólk.
Rússneska fyrirsætan Sasha Luss fer með aðalhlutverkið en Luke Evans, Helen Mirren og Cillian Murphy leika einnig í þessari 30 milljón dollara mynd, sem frumsýnd verður í Bandaríkjunum 21. júní nk.
Opinber söguþáður er á þá leið að á bakvið töfrandi fegurð Anna Politova er leyndarmál sem mun leysa úr læðingi ótrúlegan styrk og hæfni til að verða einn hættulegasti leigumorðingi í heimi.
Besson skrifar einnig handrit ásamt því að leikstýra.
Sjáðu fyrstu stiklu hér fyrir neðan: