The Specialist (1994)

Ray Quick og Ned Trent voru félagar og samstarfsmenn; einhvers konar sprengjusérfræðingar hjá CIA sem voru sendir hingað og þangað til að ráða illmenni af dögum. En þeim lenti saman og eru nú svarnir óvinir. Síðan eru liðin 10 ár. Ray býr nú í Miami og er hættur hjá CIA en er ennþá í sprengjubransanum; hann er nokkurs konar málaliði sem auglýsir þjónustu sína á Internetinu en tekur ekki að sér að vinna verk af þessu tagi nema þegar nauðsyn krefur til að hann nái endum saman og aðeins ef málstaðurinn er góður. May Munro vill ráða Ray Quick í þjónustu sína til þess að hefna fyrir dauða foreldra sinna sem kúbverskir mafíósar myrtu fyrir framan augun á henni þegar hún var lítil. Í fyrstu vill Ray ekkert hafa með málið að gera og því tekur May málið í eigin hendur og fer að gera sér dælt við mafíósana, foringjann Joe Leon en þó einkum son hans og erfingja Tomas. Hún heldur hins vegar sambandi gegnum síma og smám saman dregst Ray að atburðarásinni og May. En það er óvænt ljón í veginum, því á launaskrá mafíósanna er enginn annar en höfuðandstæðingur Rays, gamli félaginn Ned Trent. Hinir svörnu andstæðingar ætla nú að gera út um gamlar sakir um leið og þeir vinna verkin sem þeir hafa tekið að sér og sprengjurnar taka að springa og bófarnir að falla.