My Big Fat Greek Wedding (2002)

Toula (Vardalos) er grísk-bandarísk einhleyp kona á þrítugsaldri og það lítur ekki út fyrir að breyting verði þar á í bráð. Þetta veldur henni nokkrum áhyggjum en þær eru ekkert í líkingu við hugarangur foreldra hennar vegna þessa mikla fjölskylduvanda. Þeir vilja senda dóttur sína til Grikklands og vonast til að hún kynnist góðum manni í Gamla landinu. Hún hefur ekki áhuga á að yfirgefa landið en þar sem hún starfar í fjölskyldufyrirtækinu, Dancing Zorba´s, grísku veitingahúsi í Chicago, verðu hún að taka tillit til skoðanna þeirra. Dag einn, eftir að hafa afgreitt myndarlegan mann og ekki þorað að tala við hann, ákveður Toula að gera róttækar breytingar á lífi sínu. Þrátt fyrir mótmæli föður síns, fer hún að læra á tölvur í kvöldskóla, tekur niður gleraugun og setur upp linsur, fær sér nýtt starf á ferðaskrifstofu og gerir stórtækar breytingar á útliti sínu og framkomu. Henni til mikillar ánægju hittir hún aftur myndarlega manninn úr veitingarhúsinu og hann býður henni út. Kennarinn Ian Miller (John Corbett) er nokkurn veginn fullkominn. Hann er hávaxinn, myndarlegur, gáfaður, góðhjartaður og alveg að falla fyrir Toulu. En það eru samt tvö smáatriði sem standa í vegi fyrir hamingju þeirra; Hann er ekki Grikki og hann er grænmetisæta, en fátt vekur meiri hrylling hjá Toula-fjölskyldunni. Þegar Ian ber upp bónorðið verður Toula að standa sem sáttaaðili milli snobbaðra yfirstéttaforeldra Ians og grískra verkamannaforeldra sinna. Svo eru það náttúrlega brúðkaupsveislan, sem móðir brúðarinnar vill halda undir formerkjunum “því meira því betra”.