The Bucket List (2007)

Carter Chambers (Morgan Freeman) og Edward Cole (Jack Nicholson) eiga bara eitt sameiginlegt. Þeir eru báðir með krabbamein. Carter er fátækur verkamaður. Cole er moldríkur og voldugur. Carter er fjölskyldumaður með mikinn áhuga á sagnfræði. Cole er sérvitur einfari með fjóra skilnaði á bakinu sem nýtur þess að pína einkaþjóninn sinn Matthew (Sean Hayes). Carter og Cole verða ágætis vinir eftir því sem líður á krabbameinsmeðferð þeirra beggja. Carter byrjar að skrifa lista yfir hluti sem hann hefði viljað gera áður en hann dæi en veit að hann mun aldrei ná að gera. Þegar Cole fréttir af listanum manar hann Carter til að láta vaða og býðst meira að segja til þess að borga brúsann. Þeir kumpánar flýja spítalann og fara í ferðalag um heiminn. Á milli þess sem þeir keyra kappakstursbíla, klifra píramída og veiða ljón í Afríku ná þeir að ræða hjartans mál. Þeir kynnast náið á stuttum tíma og hjálpa hvorum öðrum að takast á við dauðann og það sem meira máli skiptir, lífið.