The Haunting in Connecticut (2009)

Myndin segir frá fjölskyldu nokkurri sem flytur úr stórborginni og í stórt hús frá Viktoríutímanum í úthverfi í Connecticut. Þau eru varla búin að taka upp úr kössunum þegar þau fara að finna fyrir undarlegum hlutum í húsinu. Fljótlega komast meðlimir fjölskyldunnar að því að húsið á sér svakalega fortíð. Ekki aðeins var húsið umbreytt útfararheimili þar sem ótrúlegir hlutir áttu sér stað á sínum tíma, heldur var Jonah, sonur þáverandi eiganda, skyggn með meiru. Hæfileikar hans ollu því að hann varð eins konar gátt á milli heims hinna lifandi og hinnar myrku veraldar handan dauðans. Nú er eins og Jonah hafi sjálfur snúið aftur eftir eigin dauða og sé búinn að koma sér rækilega fyrir á heimilinu og fer hann sérstaklega að ásækja unglingsson hjónanna Söru og Peters, Matt (Kyle Gallner), en smám saman ágerist draugagangurinn þar sem hin saklausa og grandalausa fjölskylda verður skotmark hans, með hræðilegum afleiðingum, nái þau ekki að komast til botns í málinu áður.