Norræn kvikmyndahátíð í Norræna húsinu hófst í gær og stendur til 22. apríl. Frítt er inn á allar myndirnar og eru flestar myndir með enskum texta.
Helstu stjörnur norrænnar kvikmyndagerðar sækja hátíðina heim í ár, þar á meðal einn aðalleikara dönsku þáttaraðarainnar 1864, Jakob Oftebro. Hann er norskur en menntaður í Danmörku og er jafnvígur á bæði dönsku og norsku.
Aðrir gestir hátíðarinnar eru Morten Kirkskov, höfundur bókarinnar Kapgang sem samnefnd mynd byggist á og Tuomas Kyrö höfundur bókarinnar sem kvikmyndin The Grump byggist á. Einnig munu framleiðendur frá Grænlandi og Svíþjóð vera með vinnustofur á hátíðinni.
Myndirnar eru allar nýlegar, með þeirri undantekningu þó að Hrafninn flýgur verður sýnd einu sinni í tengslum við vinnustofu um samstarf Íslendinga og Svía í kvikmyndaiðnaðinum. En Hrafninn flýgur er hvergi jafnvinsæl og hjá grönnum okkar Svíum.
Leikarinn Jakob Oftebro mun taka þátt í hátíðinni og sitja fyrir svörum. Rithöfundarnir Tuomas Kyrö og Morten Kirkskov munu einnig taka þátt í spurt og svarað að loknum myndunum The Grump og Kapgang en þær eru byggðar á verkum eftir þá. Frítt inn á alla viðburði
Hér að neðan má sjá yfirlit yfir „Spurt og svarað“ á hátíðinni.
17. apríl
Kl: 16:00 Eskimo Diva
Myndin Eskimo Diva fjallar um Nuka Bisgaard og baráttu hans fyrir réttindum samkynhneigðra á Grænlandi. Nuka er upphafsmaður Gay Pride göngunnar í Nuuk. Nuka situr fyrir svörum eftir sýningu á myndinni ásamt Lene Stæhr leikstjóra myndarinnar.
18.apríl
20:00 The Grump
Huldar Breiðfjörð spjallar við Tuomas Kyrö höfund bókarinnar The Grump sem samnefnd mynd var gerð eftir. Myndin hefur slegið í gegn á Norðurlöndunum.
19.apríl
19:30 Kraftidioterne
Vera Sölvadóttir spjallar við Jakob Oftebro um feril hans og myndina Kraftidioten.
20.apríl
19:30 Kapgang
Rakel Garðarsdóttir spjallar við höfund bókarinnar Kapgang, Morten Kirkskov en hann er einnig handritshöfundur að myndinni Den eneste ene.