Practical Magic (1998)

Sally og Gillian Owens hafa alla tíð vitað að þær væru ekki eins og fólk er flest. Eftir að þær misstu foreldra sína ólu frænkur þeirra þær upp á heimili sem vægast sagt var óvenjulegt og þar sem engum reglum var fylgt. Þegar þær voru litlar fengu þær súkkilaðiköku í morgunmat, vöktu frameftir og lásu galdrakver, og lögðu stund á hvítagaldur sem iðkaður hafði verið í fjölskyldunni af hverri kynslóðinni á fætur annarri. Frænkurnar, þær Jet og Frances, leggja sig fram við að vekja hjá systrunum hina einstöku dulrænu hæfileika sem fylgt hafa konum af Owens ættinni í þeirri von að veita þeim þann styrk sem fylgir því að iðka galdra í nytsamlegum tilgangi. En galdrasæringar Owens kvennanna kosta sitt og þeim fylgir reyndar hin mesta bölvun, því mennirnir sem þær verða ástfangnar af eru dæmdir til ótímabærs andláts. Þegar hin hægláta Sally fylgist með frænkum sínum stunda galdra til hjálpar einstæðingum og ástlausu fólki byrjar hún að gera sér grein fyrir því sem hún hefur ætíð haldið, nefnilega að hún muni aldrei eignast sálufélaga. Hún reynir því að draga sig í hlé frá frænkum sínum og afneita þeim öflum sem hún býr yfir, og reynir hún allt hvað hún getur til að lifa galdralausu og eðlilegu lífi. Gillian sem aftur á móti er ærslafull, kærulaus og eirðarlaus og nýtur þess að finna valdið sem hún hefur yfir karlmönnum, leggur ríka rækt við hæfileika sína og skilur margan manninn eftir með brostið hjarta. Þegar Gillian kynnist Jimmy sem er meinfýsinn flækingur verður hún til þess að hrinda af stað atburðarás sem gerir það að verkum að lögreglumaðurinn Gary Hallet leggur leið sína heim til þeirra. Sally snarfellur fyrir honum strax og hún sér hann og úr læðingi leysast allskyns dularfullir kraftar sem ógna lífi allra Owens kvennanna.