Something Borrowed (2011)

Rachel á erfitt með að tjá Dex tilfinningar sínar. Henni finnst þau ætluð hvort öðru, þau eiga sameiginleg áhugamál, ganga í sama skóla, læra bæði lögfræði, eiga auðvelt með að hlæja saman. En einhverra hluta vegna getur hún ekki fengið sig til að bjóða honum út. Vinkona hennar, Darcy, er ekki eins feimin og hvetur Dex til að bjóða Rachel út. Í staðinn býður hann Darcy sjálfri. Eitt leiðir að öðru og áður en þau vita af eru Darcy og Dex orðin par. Tíminn líður. Rachel reynir að gleyma tilfinningum sínum en gengur erfiðlega að finna ástina hjá öðrum, þrátt fyrir að vera eftirsóttur lögfræðingur. Dex og Darcy ákveða að gifta sig og fer návígið við Dex í brúðkaupsundirbúningnum að fá virkilega á Rachel. Á þrítugsafmælinu dettur hún í það og í stað þess að drekkja sorgum sínum segir hún Dex hug sinn og þau enda saman uppi í rúmi. Upphefst þá mikil sálræn barátta – hvort er mikilvægara, ástin sem þú getur ekki gleymt eða vinskapurinn við bestu vinkonu þína?