Ný íslensk gaman-spennumynd, Fullir vasar, verður frumsýnd í dag í Smárabíói, Háskólabíói, Borgarbíó Akureyri og Laugarásbíói. Fullir Vasar er nýjasta mynd leikstjórans og handritshöfundarins Antons Sigurðssonar og fjallar um fjóra menn sem ræna banka til að eiga fyrir tugmilljóna skuldum eins þeirra við hættulegasta mann Íslands. Í kjölfar þess fer í gang atburðarás sem enginn hefði getað séð fyrir.
Hér er á ferðinni gamanmynd með spennuívafi og söguþræði sem kemur skemmtilega á óvart, að því er fram kemur í tilkynningu frá Senu.
Hjálmar Örn Jóhannesson leikur hinn frekar misheppnaða Arnar Thor sem hefur komið sér í tug milljóna króna skuld við hættulegasta mann Íslands sem leikinn er af Ladda. Til að bjarga sér út úr klípunni fær hann til liðs við sig þrjá menn til að ræna bankann, grímuklæddir og vopnaðir. Hvað gæti farið úrskeiðis?
Með hlutverk fjórmenninganna í myndinni fyrir utan Hjálmar fara þeir Aron Már Ólafsson og Áttu-mennirnir Egill Ploder Ottósson og Nökkvi Fjalar Orrason.
Einnig koma við sögu í myndinni þau Hilmir Snær Guðnason, Salka Sól Eyfeld, Júlíana Sara Gunnarsdóttir, Ólafía Hrönn Jónsdóttir og Helga Braga Jónsdóttir m.a.
Sjáðu stiklu úr myndinni hér fyrir neðan og plakat þar fyrir neðan:
