Shark Night 3D (2011)

Sjö vinir úr menntaskóla ákveða að skella sér í helgarfrí út á eyju eina þar sem foreldrar eins þeirra eiga sumarbústað. Eyjan stendur úti á miðju vatni sem tengist sjónum þótt strönd hans sé nokkra kílómetra í burtu. Þetta er sannkölluð paradís á Jörðu og vinirnir sjö sjá fram á stórskemmtilega helgi og skemmtun, ekki síst við köfun og annað vatnasport enda fylgir bústaðnum ágætur hraðbátur, sérútbúinn til að draga fólk á vatnaskíðum. En gamanið kárnar samstundis þegar einn vinanna lendir í hrikalegu slysi sem krefst þess að hin komi honum strax á sjúkrahús áður en honum blæðir út. Þau leggja af stað í bátnum en komast þá að því sér til skelfingar að vatnið er skyndilega orðið krökkt af risastórum hákörlum sem eru sko ekki á því að láta jafngómsætar máltíðir og vinina sjö sleppa svo létt. Þar með er hafin æsileg barátta ungmennanna við skepnur sem eru álíka ófríðar og þær eru grimmar ...